debajanqueen

deoriginalrudeboy

Registered User
miss lady how yuh goin this sunday afternoon? lass time it was a sunday whey yuh cuss somebody bout dat machel fete on imix lol, and yuh was tellin we bout all dat food yuh was cookin? whu yuh cookin today?
any good fetes lately?
how many day till bim? yuh playin mas?
 

debajanqueen

New member
Wellllll since yuh axe.....man nuttin aint gine on today or rather duh de past four days cause dem people got muh under SARS quarantine..NO I AINT GOT IT..but dis hardears teenager who mudda got it and in hospital pun a ventilater and himself was showing signs decided wid he bright ass tuh come up in muh work place tuh tek he driving test tuh get he licence bosie...not only dat he decided tuh go tuh school --- so de rasshole boy got over 700 people in quarantine just cause he didnt use de sense dat de good lord gih he and stay he ass home.(yuh got muh started now)

De ting dat is killin' me is dat if he whole school shut down den why am i only one of three people at muh workplace tuh be indoors. WE did a work stoppage at we wuk when did SARS ting start up cause we does wuk close enough wid de public(if you havent figured it out i wuk in de DMV) dem say no...we started tuh wear we on gloves and dem say tek dem off cause dem offending de public....well looka wha happen now - i at home like a rasshole monk starring out de winda' feelin like i in de mental.

So to answer you other questions my mudda doin de cookin today - simple rice and peas and some bake chicken dat mekkin me drool through muh mask!!!!

49 more days till Bim(TANK DE LORD) playin mass i aint know nuh costumes online yet for me tuh see so who knows? as fuh fetes not much gine on hey - we still waiting fuh de sun tuh appear you would tink dat we does live in de North Pole or someting' boat cruises an ting comin up so i getting in shape so i can floss meh new body and get my waistline oil up fuh Bim.

I GONE
 

deoriginalrudeboy

Registered User
how de boi so chupid? steups. he need a good kick in he a$$. ah think in de carnival section of imix dey had pics of harbour lights, is that a band in bim, only wite gyal and dem as de models. gyal at least yuh gettin tuh sunshine soon, spring garden go be hot gyal.
ah go ley yuh geh back tuh yuh muddah cookin. in de meantime ah go see whu we have tuh eat. is long time now i feeling fuh some pholourie, or some doubles...steups.
 

debajanqueen

New member
Well i gine let you know if i in jail fuh cuttin' dat boy ass cause i feel tuh just strangle he - but he gine through he own hell right now wid dis SARS ting it aint pretty....
Harbour Lights aka Harbour Whites..is just that a lot of tourist and foolish black men dat does fee off a dem...de only good ting is dat dem got drinks free pun a Wed so i does go an drink a get a laff offa de tourists
 
Top