(c) copyright Miguel Browne
Yuh remember dem nancy stories dat granny used to tell?
Dey uses to frighten yuh and make yuh shake like hell.
Yes dem stories 'bout soucouyant, la diablesse and douen,
De stories 'bout lagahoo, Papa Bois and de rest of dem.
But as yuh get older look what yuh gone and do.
Disco and computer make yuh believe dem stories not true.
Is de ugly Ninja Turtles, Spiderman and Alf wid he big, big mouth.
Nowadays is dese characters dat children does talk about.
But if yuh look around in every nook and cranny,
In de square, in de car or yuh house yuh sure to find jumbie.
So if yuh feel it doh have jumble yuh very well lie.
Listen to mih story and yuh go find out why.
Now La Diablesse was a woman of de night.
Leading worthless men over precipice was her delight.
Wid one good foot and one cow foot she would parade up and down,
Dealing wid all dem macho men dey have in town.
But in dese days of technology and plastic surgery
De foot of de La Diablesse yuh just cah see.
So La Diablesse doh have to wear long dress to hide she foot again.
Is mini, short pants and high heels dat does cause dem pain.
So Port-of-Spain full ah La Diablesse dat looking sexy and slick.
But many of dem still up to dey dirty tricks.
Some does tell yuh dey love yuh, yes, dey love yuh bad.
But is de same thing dey does say to all de men in Trinidad.
Some does flirt with de boss both night and day.
So in de end dey does collect two packets of pay.
Others does even marry yuh wid a well thought out plan,
To nag yuh, den divorce yuh, and den get all de house and land.
But some La Diablesse ah tell yuh dey sweet too bad.
Yes, ...de sweetest La Diablesse are to be found in Trinidad.
And how many of you had friends dat yuh believe so honest and true?
But deep down inside dey is really lagahoo.
Yuh see de lagahoo uses to be a man during de day,
But in de night he woulda change to a beast to frighten people away.
"Cast yuh bread upon de ocean," is what de bible say.
Cast it wid love and it go come back to you some day.
But ah cast so much bread dat de bakery run out.
And mih friends cah give mih a crumb to put in mih mouth.
So yuh friends does drink and lime wid yuh.
But behind yuh back dey bad-talking yuh.
And if dey see yuh grass looking green and strong,
Dey does find every way just to cut it down.
And doh even beg dem lagahoo for a match,
'Cause de whole ah town go hear 'bout dat.
"Every skin teeth is not a laugh," so granny used to say.
So look out for dem lagahoo every night and day.
Walk wid yuh dagger to deal wid dem lagahoo,
And stab dem good before dey stab you.
And if yuh still believe it really doh have jumbie.
Look how much things does get thief and yuh sure to see.
Cars and car tyres does disappear just so.
Jumbie does break in yuh house and nobody doh know.
But is only Papa Bois and his little friends,
Dem unbaptised children granny used to call douens.
Yuh see Papa Bois doh have no forests to hunt in again.
So he all about town hunting for a new type of game.
And de douen foot still pointing in de wrong direction,
'Cause it should be pointing straight to de police station.
For a little bit of coke dem douens will thief and lie,
Cuss dey mudder and kill dey brother just to get a high.
But is like Papa Bois uncle was once a police,
'Cause de more dey look is de more dey does thief.
So when dem jumble raid yuh doh bother to call de police.
Take my advice and call de exorcist or priest.
And what about de ball of fire dat does fly through de sky?
And when it land, it does suck yuh blood dry.
Well we still have plenty soucouyant in dese lands.
Dem blood-sucking politicians wid dey crazy plans.
But whereas long time soucouyant uses to work by night,
Dese soucouyant does suck even in broad daylight.
Dey does stand up on platforms saying what dey go do,
But dey only ambition in life is to get some blood from you.
And soucouyant doh let one drop of blood go to waste,
So dey does form unions and goups according to dey taste.
Some does suck people in corridors again and again.
Some does look for dey victims in de fields of sugar cane.
And dese state-of-the art soucouyant good at flying too.
Dey does fly all over de world wid de money dey take from you.
Some does fly as far as Africa and come back as a chief.
Some does fly to Washington looking for financial relief.
And some soucouyant does argue 'bout dragon and some 'bout dove.
Some does play wid "flowers" and some wid "one love."
And jumbies does get together at different times of the year.
And cause confusion and comess 'cause dey really doh care.
At Christmas time some does take de form of business men,
And raise de prices of de goods dat yuh have to buy from dem.
Some does take dey place in parang band
And prevent it from singing as best it can.
And at Carnival time, boy dey does create bacchanal.
Is jam session and bad results to spoil de festival.
And Some does throw jumbie beads right inside de band,
So by October is a set ah pickney and unwanted children.
And every holiday dey make sure it have accident in town.
And at Easter and Independence somebody does always drown.
And some does spread disease, scandal and vice.
Some does kidnap children and make people take dey life.
And if all dat wickedness is just not enough,
Some does write in de newspapers to do dey dirty stuff.
So it have jumble from Port-of-Spain right up to Toco
In Arima, Castara, Moruga and San Fernando.
So when yuh bounce dem up doh look lost.
Watch dern straight in de face and show dem yuh cross.
But if dey follow yuh dat aint no fun.
Put wheels on yuh heels and start to run.